ཏཱ་ལའི་བླ་མ་མཐོ་རིམ་སློབ་གཉེར་ཁང་།

༧གོང་ས་མཆོག་གིས་ལྷོ་ཕྱོགས་སུ་བཙུགས་པའི་བོད་ཕྲུག་ཁྱིམ་སྡེའི་མཐོ་སློབ་དེར་ཏཱ་ལའི་བླ་མ་མཐོ་རིམ་སློབ་གཉེར་ཁང་ཞེས་མཚན་གསོལ་ཡོད་འདུག

ཕྱི་ཚེས་ ༡༦ ཉིན་༧གོང་ས་མཆོག་གིས་ལྷོ་ཕྱོགས་བྷེང་ལོར་ནས་བོད་ཕྲུག་ཁྱིམ་སྡེའི་མཐོ་སློབ་ཐོག་མ་དེ་དབུ་འབྱེད་གནང་སྟེ། མཐོ་སློབ་དེར་ཏཱ་ལའི་བླ་མ་མཐོ་རིམ་སློབ་གཉེར་ཁང་ཞེས་མཚན་གསོལ་ཡོད་འདུག མཐོ་སློབ་དབུ་འབྱེད་ཀྱི་མཛད་སྒོར་ཉེ་འཁོར་གྱི་བོད་མི་ ༣༠༠༠ ལྷག་དང་བྷང་ལོར་སློབ་གཉེར་བྱེད་བཞིན་པའི་འབྲུག་པའི་སློབ་ཕྲུག་ ༣༠༠ བཅས་ཕེབས་ཡོད་པ་རེད།

༧གོང་ས་མཆོག་གིས་ཀར་ཎ་ཊར་ཀ་མངའ་སྡེ་གཞུང་གིས་ད་བར་དུ་བོད་མིའི་གཞིས་སྒར་ཁག་དང་ཆོས་དང་རིག་གཞུང་གི་སློབ་གཉེར་བསྟི་གནས་ཁག་འཛུགས་བཅུག་པར་མཐུན་རྐྱེན་རོགས་རམ་གནང་བར་ཐུགས་རྗེ་ཆེ་ཞུས་ཡོད་འདུག

མཛད་སྒོ་འདིའི་སྟེང་ཀར་ཎ་ཊར་ཀ་མངའ་སྡེ་གཞུང་གི་མཐོ་རིམ་ཤེས་རིག་བློན་ཆེན་ཟུར་པ་སྐུ་ཞབས་ G Parameshwar མཆོག་དང་། བཙན་བྱོལ་བོད་གཞུང་གི་ལྷོ་ཕྱོགས་གཞིས་ཁག་གི་སྤྱི་ཁྱབ་འགན་འཛིན་སྐུ་ཞབས་ཀུན་དགའ་རྡོ་རྗེ་སོགས་མཛད་སྒོར་ཕེབས་ཡོད་ལ། སྐུ་ཞབས་ G Parameshwar ལགས་ཀྱིས་མཐོ་རིམ་སློབ་གཉེར་ཁང་འདིར་ཐུགས་རེ་ཅི་ཡོད་ཀྱི་བཀའ་སློབ་དང་སྦྲགས་མཐོ་སློབ་འདིའི་ཆེད་དུ་ཧིན་སྒོར་ ༥༠༠༠༠༠ ཞལ་འདེབས་སུ་གནང་ཡོད་པ་རེད།