ཐའེ་ལྦན་སྲིད་འཛིན་

ཐའེ་ལྦན་གྱི་སྲིད་འཛིན་ཟུར་པར་ཁྲིམས་ཐག་གཅོད་རྒྱུར་ངོ་རྒོལ།

ཐའེ་ལྦན་གྱི་སྲིད་འཛིན་ཟུར་པ་ཁྲེན་ཧྲུའུ་བེན་མཆོག་ལ་ལྐོག་ཟ་རུལ་སུངས་ཀྱི་ནག་ཉེས་ཉེས་འཛུགས་བྱས་པ་

དེར་རེས་གཟའ་པ་སངས་ཉིན་ཐའེ་ལྦན་གྱི་རྒྱལ་ས་ཐའེ་པེ་ཡི་ཁྲིམས་ཁང་ནས་ཐག་གཅོད་བྱ་རྒྱུ་ཡིན་པར་བརྟེན་

དེ་ཉིན་སྲིད་འཛིན་ཟུར་པ་ཁྲེན་ཧྲུའུ་བེན་ལ་རྒྱབ་སྐྱོར་ཞུ་མཁན་མི་དམངས་ལྔ་བརྒྱ་ལྷག་གིས་ཐའེ་པེ་ཁྲིམས་ཁང་

གི་མདུན་དུ་ངོ་རྒོལ་གྱི་ལས་འགུལ་སྤེལ་རྒྱུའི་འཆར་གཞི་ཡོད་པ་རེད།

དེ་རིང་རེས་གཟའ་ལྷག་པའི་ཉིན་སྲིད་འཛིན་ཟུར་པ་སྐུ་ཞབས་ཁྲེན་ཧྲུའུ་བེན་གྱི་ལས་ཁུངས་ཀྱི་དྲུང་ཆེ་ཅང་ཁྲི་

མིང་གིས་སྲིད་འཛིན་ཟུར་པ་ཁྲེན་ཧྲུའུ་བེན་མཆོག་ལ་རྒྱབ་སྐྱོར་ཞུ་མཁན་ཚོས་ད་རེས་ཁྲིམས་ཁང་ནས་ཁོང་ལ་

ལོ་དུས་རིང་ཐུང་ལ་མ་ལྟོས་པར་བཙོན་འཇུག་གི་ཉེས་ཆད་ཐག་གཅོད་བྱ་རྒྱུ་ཡིན་པ་ཚོད་དཔགས་བྱེད་ཀྱི་ཡོད་

པར་བརྟེན་རེས་གཟའ་པ་སངས་ཉིན་ཁོང་ཚོ་རྒྱལ་ས་ཐའེ་པེ་ཡི་ཁྲིམས་ཁང་གི་མདུན་དུ་འདུ་འཛོམས་བྱས་ཏེ་

ཁྲིམས་ཁང་གི་ཐག་གཅོད་ལ་ཁོང་ཁྲོའི་ངོ་རྒོལ་གྱི་རྣམ་པ་བཏོན་ཐབས་བྱ་རྒྱུ་ཡིན་པ་དང་ལྷག་པར་དུ་ཁོང་ཚོས་

ཁྲིམས་ཁང་ནས་སྲིད་འཛིན་ཟུར་པ་ཁྲེན་ཧྲུའུ་བེན་མཆོག་ལ་ཁྲིམས་བཤེར་དྲང་བདེན་བྱས་མེད་པ་དང་ཁྲིམས་

ཁང་གིས་ཐག་གཅོད་ལྗིད་པོ་བྱ་རྒྱུ་ཡིན་པ་ངོས་འཛིན་བྱེད་པ་མ་ཟད་ཁྲིམས་ཁང་གི་ཐག་གཅོད་དེར་ཁོང་ཚོས་

ནམ་ཡང་ངོས་ལེན་བྱེད་ཀྱི་མ་རེད་ཅེས་གསུངས་ཡོད་པ་རེད།

སྲིད་འཛིན་ཟུར་པ་སྐུ་ཞབས་ཁྲེན་ཧྲུའུ་བེན་གིས་ཁོང་དང་ཁོང་གི་སྐུ་ཟླ་གཙོས་པའི་ནང་མི་ཚོར་ལྐོག་ཟ་རུལ་སུངས་

ཀྱི་ནག་ཉེས་བཙུགས་པ་དེ་ནི་བདེན་པ་མ་རེད་ཅེས་ངོས་ལེན་གནང་གི་མེད་པ་མ་ཟད་ཁོང་དང་ནང་མི་ཚོར་ནག་

ཉེས་བཙུགས་པ་དེ་ནི་རྒྱ་ནག་དང་མཛའ་གྲོགས་ཀྱི་འབྲེལ་ལམ་འཛིན་མཁན་སྲིད་འཛིན་མཱ་དབྱིང་ཇུ་ཡི་ཆབ་སྲིད་

ཀྱི་བརྒྱུད་སྐུལ་དང་གཏམ་བརྗོད་ཅིག་རེད་ཅེས་གསུངས་ཀྱི་ཡོད་པ་རེད།