མི་ལྔ་དམར་བསད་

རྒྱ་གར་མའོ་གྱེན་ལོག་ཤོག་ཁག་གིས་མི་ལྔ་དམར་བསད་བཏང་བ།  མའོ་གྱེན་ལོག་ཤོག་ཁག་གི་མི་སྣ་ཁག་ཅིག་གིས་རྒྱ་གར་གྱི་ཞིང་ཁུལ་དུ་མི་སྣ་ལྔ་དམར་བསད་བཏང་ཡོད་པའི་

གནས་ཚུལ་ཐོན་བཞག           རེས་གཟའ་ཟླ་བའི་སྔ་དྲོ་མའོ་གྱེན་ལོག་ཤོག་ཁག་གི་མི་སྣ་གསུམ་བཅུ་ཙམ་ལེ་ཀི་

ཡ་གྲོང་གསེབ་ནང་འཛུལ་བཞུགས་བྱས་ནས་དེ་རིང་གཏོར་རྒོལ་བཏང་བ་དང་གྲོང་གསེབ་མི་མང་ལྔ་བཙན་ཁྲིད་

ཀྱིས་དམར་གསོད་བཏང་ཡོད་པ་རེད་ཅེས་ཇཱར་ཀན་མངའ་སྡེའི་རན་ཆི་གྲོང་ཁྱེར་གྱི་ས་གནས་ཉེན་རྟོག་དཔོན་

རིགས་ཤིག་ནས་དེ་རིང་གསལ་སྟོན་གནང་བཞག    ཡང་གོང་ཞུས་ས་གནས་ཉེན་རྟོག་པས་མུ་མཐུད་གསུངས་

ན་མའོ་གྱེན་ལོག་ཤོག་ཁག་གིས་འདས་པའི་ལོ་ངོ་སུམ་ཅུ་ཙམ་རིང་ས་གནས་དེ་ཚོའི་ནང་གི་གྲོང་གསེབ་པར་

ལས་ཀ་སྤྲོད་དགོས་པ་དང་དབུལ་ཕྱུག་གཉིས་དབར་བཏང་སྙོམ་དགོས་པ་སོགས་ཀྱི་ཐོག་ནས་ངོ་རྒོལ་གྱི་ལས་

འགུལ་ཐེངས་མང་སྤེལ་ཡོད་པ་དང་ལས་འགུལ་དེའི་ཁྲོད་ས་གནས་ཉེན་རྟོག་པ་དང་དམག་མི་མི་མང་སོགས་

ཁྱོན་མི་གྲངས་ཉིས་སྟོང་ཙམ་རྐྱེན་འདས་སུ་ཕྱིན་ཡོད་པ་རེད།

དེ་ག་ནང་བཞིན་མའོ་གྱེན་ལོག་ཤོག་ཁག་གི་ཟླ་བ་སྔོན་མ་དེའི་ནང་རྒྱ་གར་གྱི་སྦི་ཧའར་མངའ་སྡེའི་པ་ཊེ་ན་གྲོང་

ཁྱེར་གྱི་ལྷོ་ངོས་སུ་གནས་པའི་སྦུན་དྲུ་གྲོང་གསེབ་ནང་གཏོར་རྒོལ་གྱི་ལས་འགུལ་ཁྲོད་མི་མང་བཞི་རྐྱེན་ལམ་དུ་

བཏང་ཡོད་པ་དང་དེ་བཞིན་ཡང་ཇར་ཀན་མངའ་སྡེའི་ནང་ངོ་རྒོལ་གྱི་ལས་འགུལ་སྤེལ་བའི་ཁྲོད་ཉེན་རྟོག་མི་

སྣས་མའོ་གྱེན་ལོག་ཤོག་ཁག་གི་མི་སྣ་རྒན་གྲས་གཉིས་འཛིན་བཟུང་བྱས་པའི་དབང་གིས་ས་ཁུལ་དེའི་ཉེ་འཁོར་

ས་གནས་སུ་མི་གསོད་ཁྲག་སྦྱོར་གྱི་ལས་འགུལ་སྤེལ་ཡོད་པ་རེད་ཅེས་ས་གནས་ཉེན་རྟོག་པས་དེ་རིང་གསལ་སྟོན་

གནང་འདུག