འགོ་ཁྲིད་ཕྱིར་འབུད་

རྒྱ་གཞུང་གིས་ཤིན་ཅང་གི་འགོ་ཁྲིད་ཅིག་ཕྱིར་འབུད་བྱས་པ། རྒྱ་ནག་གིས་ཤིན་ཅང་ཞེས་འབོད་པའི་ཤར་ཏུར་ཀི་སི་ཐན་གྱི་རྒྱལ་ས་ཨུ་རུམ་ཆི་ནང་ཉེ་ཆར་དོན་མེད་སྨན་ཁབ་

བཙུགས་ནས་མི་ལྔ་རྐྱེན་ལམ་དུ་བཏང་བའི་དོན་རྐྱེན་བྱུང་རྗེས་ཁུལ་དེའི་ནང་གི་རྒྱ་ཧན་མི་རིགས་ཚོས་ངོ་རྒོལ་

བྱས་པའི་གནས་ཚུལ་བྱུང་བར་བརྟེན་ད་ཆ་ཁུལ་དེའི་དམར་ཤོག་ཚོགས་པའི་འགོ་ཁྲིད་ཕྱིར་འབུད་བཏང་འདུག  

རྒྱ་ནག་གཞུང་འབྲེལ་ཤིན་ཧཱ་གསར་ལས་ཁང་གིས་སྤེལ་བའི་གནས་ཚུལ་ནང་གྲོང་ཁྱེར་ཨུ་རུམ་ཆིའི་དམར་ཤོག་

ཚོགས་པའི་འགོ་ཁྲིད་ལི་ཀྲི་དེ་རིང་ཕྱིར་འབུད་བཏང་ཡོད་པའི་གནས་ཚུལ་གསལ་བསྒྲགས་བྱས་ཡོད་པ་ལས་རྒྱུ་

མཚན་ཇི་ཡིན་གསལ་བཤད་བྱས་མེད་ནའང་རེས་གཟའ་ཕུར་བུ་དང་པ་སངས་གཉིས་ལ་ཨུ་རུམ་ཆི་ནང་མི་མང་

སྟོང་ཕྲག་མང་པོས་ངོ་རྒོལ་བྱེད་སྐབས་འགོ་ཁྲིད་ལི་ཀྲི་དང་དཔོན་རིགས་གཞན་ཚོས་གྲོང་ཁྱེར་ནང་མང་ཚོགས་

ཀྱི་བདེ་འཇགས་འགན་ལེན་ཡག་པོ་བྱས་མེད་པའི་སྐྱོན་བརྗོད་ཐོག་ནས་ལི་ཀྲི་ཕྱིར་འབུད་བྱ་རྒྱུའི་དགོས་འདུན་

བཏོན་ཡོད་པ་རེད།

འདས་པའི་བདུན་ཕྲག་གི་ནང་ཨུ་རུམ་ཆི་ཁུལ་དུ་སྨན་ཁབ་བཙུགས་ནས་གནོད་འཚེ་བྱེད་བའི་ལམ་སྲོལ་ཞིག་

དར་ཡོད་པ་དེ་རྒྱ་ནག་གི་འཛིན་སྐྱོང་དཔོན་རིགས་ཚོས་ཡུ་གུར་ཁ་ཆེའི་མི་རིགས་ཚོའི་བྱ་སྤྱོད་ཡིན་པའི་སྐྱོན་

འཛུགས་བྱས་ཏེ་ཁུལ་དེའི་ནང་རྒྱ་ཧན་མི་རིགས་དང་ཁ་ཆེ་ཡུ་གུར་མི་རིགས་དབར་འགལ་ཟླ་ཆེ་རུ་འགྲོ་རྒྱུའི་

ཉེན་ཁ་ཆགས་བཞིན་ཡོད་པ་རེད།

གོང་ཞུས་གནས་སྟངས་དེའི་ཐོག་བཏང་འཛིན་ཐུབ་ཐབས་སུ་རྒྱ་ནག་གི་འཛིན་སྐྱོང་དཔོན་རིགས་ཚོས་ལི་ཀྲི་

ལས་གནས་ནས་ཕྱིར་འབུད་བཏང་སྟེ་དམར་ཤོག་ཚོགས་པའི་འགོ་ཁྲིད་ལ་གྲོང་ཁྱེར་ཨུ་རུམ་ཆིའི་ནང་གི་ཁྲིམས་

དོན་ལག་བསྟར་འགན་འཛིན་ཀྲུའུ་ཧའེ་ལུན་བསྐོ་བཞག་བྱས་ཡོད་པ་རེད།         གྲོང་ཁྱེར་ཨུ་རུམ་ཆི་ནང་སྨན་

ཁབ་བཙུགས་ནས་གནོད་འཚེ་བྱེད་ཡག་གི་བྱ་སྤྱོད་དེ་ཕྱི་ཟླ་བརྒྱད་པའི་ཚེས་ཉི་ཤུ་ནས་འགོ་འཛུགས་བྱུང་ཡོད་

ཅིང་ཁ་ས་ཨུ་རུམ་ཆི་གྲོང་ཁྱེར་སྤྱི་ཁྱབ་ཀྲང་ཧུང་གིས་སྨན་ཁབ་བཙུགས་མཁན་ཡིན་པར་དོགས་པ་བྱེད་སའི་མི་

ཉི་ཤུ་རྩ་གཅིག་ད་བར་འཛིན་བཟུང་བྱས་པའི་ནང་ནས་མི་གྲངས་བཞིའི་ནག་ཉེས་ར་འཕྲོད་བྱུང་ཡོད་པ་དང་

དེ་ཚོ་ཚང་མ་ཡུ་གུར་མི་རིགས་ཡིན་པ་དང་གནོད་འཚེ་གཏོང་ཡུལ་དེ་ཚོ་ཕལ་ཆེ་བ་རྒྱ་ཧན་མི་རིགས་ཡིན་སྐོར་

འགྲེལ་བརྗོད་བྱས་འདུག

ཇར་མ་ནི་ནང་རྟེན་གཞི་བྱས་པའི་འཛམ་གླིང་ཡུ་གུར་ཚོགས་པས་བརྗོད་ཡག་ལ་འདས་པའི་ཉི་མ་གཉིས་རིང་

རྒྱ་ཧན་མི་རིགས་ཚོས་ངོ་རྒོལ་བྱས་པའི་སྐབས་ཡུ་གུར་མི་རིགས་བཅུ་རྐྱེན་ལམ་དུ་བཏང་ཡོད་པ་དང་ངོ་རྒོལ་བྱེད་

མཁན་ཚོས་རེས་གཟའ་པ་སངས་ཉིན་ཨུ་རུམ་ཆི་ཁུལ་གྱི་ནན་མོན་ཁ་ཆེའི་མཆོད་ཁང་ནང་བཙན་འཛུལ་བྱ་རྩིས་

བྱས་ཡོད་ནའང་འཛིན་སྐྱོང་མི་སྣ་ཚོས་བཀག་འགོག་བྱས་ཡོད་པ་རེད༎