རྒྱ་གར་དུ་ཕེབས་འབྱོར

༸གོང་ས་མཆོག་ཐའེ་ལྦན་ནས་རྒྱ་གར་དུ་ཆིབས་ཞལ་བསྒྱུར་བ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དུས་ཡུན་ཉིན་གྲངས་ལྔའི་རིང་

གི་ཆོས་ཕྱོགས་ཀྱི་མཛད་རིམ་ཁག་ལེགས་གྲུབ་ཀྱིས་ཕྱི་ཚེས་བཞིའི་སྔ་དྲོ་ཐའེ་ལྦན་ནས་རྒྱ་གར་ཕྱོགས་སུ་ཆིབས་ཞལ་

བསྒྱུར་མཛད་ཡོད་པ་རེད།     སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་རེས་ཐའེ་ལྦན་གྱི་ལྷོ་ཕྱོགས་རྫོང་

དང་གྲོང་ཁྱེར་ཁག་བདུན་གྱི་དཔོན་རིགས་ཀྱིས་ཇི་ལྟར་གསོལ་འདེབས་ཞུས་པ་བཞིན་ཐའེ་ལྦན་ནང་ད་རེས་རྒྱ་

མཚོའི་རླུང་འཚུབ་ཀྱིས་རྐྱེན་པས་ཆུ་ལོག་གི་གནོད་འཚེ་ཕོག་ཡུལ་དུ་ཐུགས་སྨོན་གསོལ་འདེབས་གནང་བར་ཆིབས་

བསྒྱུར་བསྐྱངས་བ་ཞིག་ཡིན་པ་དང་༸གོང་ས་༸སྐྱབས་མགོན་ཆེན་པོ་མཆོག་ནས་ཀྱང་ད་རེས་ཐའེ་ལྦན་ནང་ཆིབས་

བསྒྱུར་བསྐྱངས་རྒྱུ་དེ་ཆོས་ཕྱོགས་ཁོ་ན་མ་གཏོགས་སྲིད་དོན་དང་འབྲེལ་བ་མེད་པ་ཐེངས་མང་བཀའ་གནང་ཡོད་

ཀྱང་རྒྱ་ནག་གཞུང་གིས་ད་རེས་༸གོང་ས་༸སྐྱབས་མགོན་ཆེན་པོ་མཆོག་ཐའེ་ལྦན་ནང་ཆིབས་བསྒྱུར་བསྐྱངས་པའི་

གནད་དོན་ཐོག་སྐྱོན་བརྗོད་ཀྱི་རྣམ་འགྱུར་ཤུགས་ཆེ་བཏོན་ཡོད་པ་དེས་ཐའེ་ལྦན་མི་མང་ཚོར་ཡང་བྱེད་སྟབས་མི་

བདེ་བ་བཟོས་ཡོད་ལུགས་ཐའེ་ལྦན་གྱི་ཕྱོགས་འགལ་དམངས་གཙོ་ཡར་རྒྱས་ཚོགས་པའི་གསལ་བསྒྲགས་སྤེལ་བའི་

ནང་འཁོད་ཡོད་པ་རེད།

ད་རེས་༸གོང་ས་༸སྐྱབས་མགོན་ཆེན་པོ་མཆོག་ཐའེ་ལྦན་དུ་ཆིབས་བསྒྱུར་བསྐྱངས་རྒྱུར་ཐའེ་ལྦན་གཞུང་གིས་

ཐོངས་མཆན་ཕུལ་བའི་རྐྱེན་གྱིས་རྒྱ་ནག་གཞུང་གིས་ཉེ་བའི་ཆར་རྒྱ་ནག་དང་ཐའེ་ལྦན་དབར་མཁའ་ཐོག་ནས་

འགྲུལ་བསྐྱེལ་གནམ་གྲུ་ཐད་ཀར་འཕུར་བསྐྱོད་ཀྱི་མཛད་སྒོ་ཕྱིར་འཐེན་བྱས་ཡོད་པ་མ་ཟད་རྒྱ་ནག་གི་དཔོན་རིགས་

ནས་སྣེ་ཁྲིད་པའི་སྐུ་ཚབ་ཚོགས་པ་ཐའེ་ལྦན་ནང་ཡོང་རྒྱུའི་འཆར་གཞི་ཁག་ཡང་ནར་འགྱངས་བྱས་པ་སོགས་ཐའེ་

ལྦན་དང་རྒྱ་ནག་དབར་དེང་སྐབས་ཡར་རྒྱས་འགྲོ་བཞིན་པའི་འབྲེལ་ལམ་ལ་ཕྲན་བུའི་གནོད་ཚབས་བྱུང་བའི་རྣམ་

པ་ཞིག་བཏོན་ཡོད་ན་ཡང་ཐའེ་ལྦན་ནང་གི་གནད་དོན་དབྱེ་ཞིབ་པ་ཚོས་རྒྱ་ནག་གི་རྣམ་འགྱུར་དེ་རིགས་གནས་

སྐབས་ཤིག་མ་གཏོག་རྒྱུན་རིང་གནས་ཐབས་མེད་པའི་དགོངས་ཚུལ་གསུང་གི་ཡོད་ཅིང་ཐའེ་པེ་ཀྱི་སུའུ་ཆའོ་སློབ་

གྲྭ་ཆེན་མོའི་ཆབ་སྲིད་དང་ཚན་རིག་སྡེ་ཚན་གྱི་དགེ་རྒན་སུའུ་ཡུང་མིང་གིས་གསུངས་ན་༸གོང་ས་ཏཱ་ལའི་བླ་མ་

མཆོག་ཐའེ་ལྦན་དུ་ཆིབས་བསྒྱུར་བསྐྱངས་པ་དེས་རྒྱ་ནག་དང་ཐའེ་ལྦན་གྱི་འབྲེལ་ལམ་ལ་ཕྲན་བུའི་གནོད་ཚབས་

བྱུང་བའི་རྣམ་པ་ཞིག་ཡོད་ཀྱང་རྒྱ་ནག་དང་ཐའེ་ལྦན་དབར་གྱི་འབྲེལ་ལམ་འཕེལ་རྒྱས་ཀྱི་རྒྱུན་རིང་ལམ་བུར་

གནོད་ཚབས་གང་ཡང་ཡོང་མི་སྲིད་པ་ཞིག་ཡིན་པ་དང་༸གོང་ས་ཏཱ་ལའི་བླ་མ་མཆོག་ཐའེ་ལྦན་དུ་ཆིབས་བསྒྱུར་

བསྐྱངས་པ་དེས་དོན་དངོས་ཐོག་རྒྱ་ནག་དང་ཐའེ་ལྦན་སོགས་གཉིས་ཀར་ཕན་ཐོགས་ཡོད་པ་ཞིག་ཡིན་པ་རེད་

ཅེས་གསུངས་བཞག།