སྲིད་བློན་དགོངས་ཞུ་

 ཐའེ་ལྦན་གྱི་སྲིད་བློན་ལིའུ་ཀྲའོ་ཤོན་ནས་དགོངས་ཞུ་གནང་རྒྱུ། 

ཐའེ་ལྦན་ནང་ད་རེས་དྲག་ཆར་རླུང་འཚུབ་ཀྱི་རང་འབྱུང་གནོད་འཚེ་ཚབས་ཆེ་ཕོག་པའི་སྐབས་ཐའེ་ལྦན་གཞུང་གི་

ལས་དོན་སྤེལ་ཕྱོགས་ལ་མང་ཚོགས་ཀྱི་བསམ་འཆར་ཤུགས་ཆེ་བཏོན་པའི་འོག་ཐའེ་ལྦན་གྱི་སྲིད་བློན་ལས་གནས་ནས་

དགོངས་ཞུ་གནང་དགོས་བྱུང་བ་བཞིན་ད་རེས་ཕྱི་ཟླ་དགུ་པའི་ཚེས་བདུན་ཉིན་ཐའེ་ལྦན་གྱི་སྲིད་བློན་ལིའུ་ཀྲའོ་ཤོན་

དངོས་སུ་སྲིད་བློན་ལས་གནས་ནས་དགོངས་ཞུ་གནང་རྒྱུ་གསར་འགོད་ལྷན་ཚོགས་ཚུགས་ནས་ཕྱིར་བསྒྲགས་གནང་

ཡོད་པ་དང་ཐའེ་ལྦན་གྱི་སྲིད་འཛིན་ནས་སྲིད་བློན་ལས་གནས་ནས་དགོངས་ཞུ་གནང་རྒྱུར་ཡང་མོས་མཐུན་གནང་

ཡོད་པ་རེད།

དེ་དང་ཕྱོགས་མཚུངས་ཐའེ་ལྦན་གྱི་སྲིད་འཛིན་ཕོ་བྲང་ནས་ཀྱང་གསར་འགོད་ལྷན་ཚོགས་སྤེལ་ནས་སྲིད་འཛིན་

མའ་དབྱིང་ཇའུ་ཡིས་གོ་མིན་ཏང་ཚོགས་པའི་དུང་ཡིག་ཆེན་མོ་ལྦུའུ་ཏུན་དབྱིད་ཐའེ་ལྦན་གྱི་སྲིད་བློན་དང་ཐའོ་

ཡོན་རྫོང་གི་རྫོང་དཔོན་ཀྲུའི་གླིས་ལུན་སྲིད་བློན་གཞོན་པར་གསར་དུ་བསྐོ་བཞག་གནང་བ་ཕྱིར་བསྒྲགས་གནང་

ཡོད་པ་རེད།

ཐའེ་ལྦན་གྱི་དགོངས་ཞུ་གནང་བའི་སྲིད་བློན་ལིའུ་ཀྲའོ་ཤོན་གྱིས་གསར་འགོད་ལྷན་ཚོགས་ཐོག་ད་རེས་ཐའེ་ལྦན་

ནང་དྲག་ཆར་རླུང་འཚུབ་ཀྱི་གནོད་འཚེ་ཕོག་པའི་སྐབས་གཞུང་གིས་ལས་དོན་སྤེལ་ཕྱོགས་ལྷོད་གཡེང་ཤོར་བའི་

ནོར་འཁྲུལ་ཡོངས་རྫོགས་ཁོང་གིས་དབུ་ཁྲིད་པའི་སྲིད་བློན་ལས་ཁང་གིས་འཁྱེར་རྒྱུ་ཡིན་པ་དང་ཕྱི་ཟླ་དགུ་པའི་

ཚེས་བཅུ་ཉིན་ཐའེ་ལྦན་གྱི་སྲིད་བློན་ལས་ཁང་གི་དཔོན་རིགས་ཡོངས་རྫོགས་དུས་གཅིག་ཏུ་དགོངས་ཞུ་གནང་

རྒྱུ་ཡིན་པ་གསུངས་བཞག

ད་རེས་ཐའེ་ལྦན་གྱི་ལྷོ་ཕྱོགས་ས་ཁུལ་ཁག་ནང་དྲག་ཆར་རླུང་འཚུབ་ཀྱི་གནོད་འཚེ་ཚབས་ཆེ་ཕོག་ནས་ཀའོ་ཞུང་

རྫོང་ཁོངས་ཀྱི་ས་ཁུལ་ཁག་ཅིག་ནང་གྲོང་ཚོ་ཚང་མ་རི་ཉིལ་བའི་འོག་བརྡིབ་ནས་མི་གྲངས་དྲུག་བརྒྱ་ལྷག་ཙམ་གྱི་

ཚེ་སྲོག་ཤོར་ཡོད་པ་དང་ཐའེ་ལྦན་གཞུང་གིས་ཐོག་མར་དྲག་ཆར་རླུང་འཚུབ་ཀྱི་གནོད་འཚེ་ཕོག་པའི་སྐབས་ཕྲལ་

དུ་སྲུང་སྐྱོབ་ལས་དོན་སྤེལ་རྒྱུར་ལྷོད་གཡེང་ཤོར་ནས་ས་གནས་དེ་ཚོའི་ནང་གི་ཡུལ་མི་ཚོ་ལམ་སེང་ཕྱིར་གནས་སྤོས་

བྱེད་མི་ཐུབ་པའི་རྐྱེན་གྱིས་མི་མང་པོ་རྐྱེན་འདས་སུ་ཕྱིན་པའི་ཡིད་སྐྱོའི་གནོད་ཚབས་བྱུང་བར་ཐའེ་ལྦན་སྤྱི་ཚོགས་

ཁྲོད་གཞུང་གི་ལས་དོན་སྤེལ་ཕྱོགས་ལ་སྐྱོན་བརྗོད་ཤུགས་ཆེ་བྱས་ནས་སྲིད་འཛིན་མའ་དབྱིང་ཇའུ་ལ་རྒྱབ་སྐྱོར་བྱེད་

མཁན་གྱི་མིའི་གྲངས་འབོར་ཡང་སྲིད་འཛིན་འོས་འདེམས་བྱེད་པའི་སྐབས་ས་བརྒྱ་ཆ་ཉི་ཤུ་ལྷག་ཉུང་དུ་ཕྱིན་པ་

སོགས་ཐའེ་ལྦན་གཞུང་ལ་དཀའ་ངལ་ཆེན་པོ་ཞིག་ཕྱད་པའི་འོག་དེའི་འགན་ལེན་དུ་སྲིད་བློན་ལིའུ་ཀྲའོ་ཤོན་གྱིས་

དབུ་ཁྲིད་པའི་སྲིད་གཞུང་གི་དཔོན་རིགས་ཚོ་ལས་གནས་ནས་དགོངས་ཞུ་གནང་དགོས་བྱུང་ཡོད་པ་རེད།