སྤྱི་དངུལ་ཧིན་སྒོར་འབུམ་ ༢ ལྐོག་ཟའི་ཐད་ཀྱི་གསལ་བཤད

སྤྱི་དངུལ་ཧིན་སྒོར་འབུམ་ ༢ ལྐོག་ཟའི་ཐད་ཀྱི་གསལ་བཤད​།

ཉེ་སྔོན་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་ཀྱིས་སྤྱི་དངུལ་ཧིན་སྒོར་འབུམ་གཉིས་ལྐོག་ཟ་བྱས་པའི་གནས་ཚུལ་བྱུང་ཡོད་ཀྱང་།  ཕྱིས་སུ་སྤྱི་དངུལ་ཕྱིར་རྩིས་སྤྲོད་དང་ཚོགས་པ་ནས་རྩ་དགོངས་ཞུས་ཡོད་འདུག

ཟླ་འདིའི་ཕྱི་ཚེས་ ༡༡ ནས་ ༡༦ བར་བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་ཐེངས་ ༡༠ ངྷ་ཤོད་བོད་ཁྱིམ་སློབ་གྲྭའི་ཚོགས་ཁང་དུ་ཚོགས་བཞིན་པ་ལྟར། ཚོགས་ཆེན་གྱི་ཉིན་གཉིས་པར་ཕྱོགས་མཐའ་ཁག་ནས་ཕེབས་པའི་ཚོགས་མི་ཞིག་གིས་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་ཀྱིས་སྤྱི་དངུལ་ཧིན་སྒོར་འབུམ་ ༢ ལྐོག་ཟ་བྱས་ཡོད་པའི་གནད་དོན་དེའི་ཐད། ཚོགས་གཙོ་དང་རྒྱུན་ལས་ནས་ཚོགས་ཆེན་ཐོག་གསལ་བཤད་བྱ་དགོས་པའི་བསམ་འཆར་བཏོན་ཡོད་པ་ལྟར། རྒྱུན་ལས་ཀྱི་ངོས་ནས་གནས་ཚུལ་དེའི་སྐོར་ཚོགས་བཅར་བ་ཡོངས་ལ་གསལ་བཤད་བྱས་ཡོད་ཀྱང་། གསར་འགྱུར་བརྒྱུད་ལམ་ཁག་ཏུ་ཡོངས་བསྒྲགས་ཐོག་གསལ་བཤད་གང་ཡང་གནང་མེད་པ་རེད། དེ་རིང་ཕྱི་ཚེས་ ༡༦ ཉིན་བུད་མེད་ལྷན་ཚོགས་ཀྱི་ངོས་ནས་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་ཀྱིས་དངུལ་འཛིན་སྤྱད་དེ་སྤྱི་དངུལ་ལྐོག་ཟ་བྱས་པའི་བདེན་དཔང་ཡིག་ཆ་ཁག་དང་མཉམ་དུ། ཚོགས་གཙོའི་ལས་ཚབ་དང་ཚོགས་གཞོན། དྲུང་ཆེ། ཟུང་དྲུང་། ཉམས་ཞིབ་པ་དང་གསར་འགོད་འགན་འཛིན་བཅས་ཀྱི་མཚན་རྟགས་བཀོད་པའི་གསལ་བཤད་ཡི་གེ་ཞིག་གནང་སོང་།

ཡིག་ཐོག་བཤད་དེའི་ནང་། ཉེ་ཆར་བོད་ཀྱི་བུད་མེད་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཁང་ནང་། སྤྱི་དངུལ་ལྐོག་ཟ་བྱས་པའི་དོན་རྐྱེན་ཞིག་ལས་འཕྲོས་ཏེ་སྤྱི་ཚོགས་ནང་གླེང་སློང་མང་དག་ཅིག་བྱུང་ཡོད་པར། འདི་ག་སྐབས་དགུ་པའི་དབུས་རྒྱུན་ལས་ཁང་ནས་སྔ་ཕྱིའི་གནས་ཚུལ་བྱུང་རྐྱེན་དང་ཐག་གཅོད་ཇི་ལྟར་བྱུང་ཡོད་མེད་འཁྱོག་བཤད་ཅི་ཡང་མེད་པར་དྲང་བདེན་གཞུང་དྲང་གིས་གསལ་བསྒྲགས་མི་བྱེད་ཐབས་མེད་སོང་བར། འདི་ལོའི་ཕྱི་ཟླ་ ༣ ཚེས་ ༢ ཉིན་ཚོགས་གཞོན་གྱིས་དངུལ་འཛིན་ (Cheque ) ཨང་གྲངས་ ༦༡༦༤༤༢ བྱས་པ་ཞིག་ཚང་མེད་པ་ཤེས་རྗེས། འབྲེལ་ཡོད་ལས་བྱེད་ཚོར་སྐད་ཆ་དྲིས་ཀྱང་དངུལ་འཛིན་བེད་སྤྱོད་བྱས་མེད་པའི་ལན་འདེབས་བྱས་ཡོད། དེ་རྗེས་རྩིས་ཁྲར་ཞིབ་འཇུག་ཞིབ་ཚགས་བྱས་རྗེས་མེག་གྷན་ཨེས་བི་ཨེའི་དངུལ་ཁང་ལ་རྩད་གཅོད་བྱ་རྒྱུར་རེ་སྐུལ་ཞུས་པ་བཞིན། དངུལ་འཛིན་དེ་ནས་ཧིན་སྒོར་འབུམ་གཉིས་ལྡི་ལི་མཐོ་སློབ་ཨེས་བི་ཨེའི་དངུལ་ཁང་ནས་རྡོ་རྗེ་གླིང་གནས་སྡོད་མཱ་ཡ་པྲ་དྷན་ (Maiya Pradhan) ཟེར་བ་ཞིག་གི་མིང་ཐོག་ཏུ་བཏང་པ་ཤེས་རྟོགས་བྱུང་ཡོད། དེ་རྗེས་དྲུང་ཆེ་དང་རྩིས་པ་གཉིས་ཀྱི་རེ་སྐུལ་ཞུས་པ་ལྟར་མེག་གྷན་ཨེས་བི་ཨེའི་དངུལ་ཁང་འགན་འཛིན་གཞོན་པས་ལྡི་ལི་མཐོ་སློབ་དངུལ་ཁང་འགན་འཛིན་ལ་འབྲེལ་བ་ཞུས་ཏེ། དངུལ་དེ་དག་ཇི་ལྟར་བཏང་ཡོད་མེད་དང་གཏོང་མཁན་སུ་ཡིན་མིན་སོགས་དང་འབྲེལ་བའི་དངུལ་བཏང་འཛིན་རེའུ་མིག་(cheque deposit slip and cheque ) ཅིག་གློག་འཕྲིན་བརྒྱུད་མེ་གྷན་དངུལ་ཁང་ཨེས་བི་ཨེའི་འགན་འཛིན་ལ་ཆ་ཚང་ཞིག་བསྐུར་གནང་ཡོད་པས། དེ་དག་ལས་ཨེས་བྷི་ཨེ་དངུལ་ཁང་ལག་དེབ་ཨང་ ༡༠༢༡༩༨༡༦༤༢༧ ནས་དངུལ་འཛིན་ཨང་གྲངས་ ༦༡༦༤༤༢ འཁོད་པའི་དངུལ་འཛིན་ (cheque ) དེའི་ཐོག་དྲུང་ཆེ་དང་ཚོགས་གཞོན་གྱི་ས་རྟགས་འཁོད་ཡོད་པ་ཤེས་རྟོགས་བྱུང་ཡོད། (དངུལ་འཛིན་ནང་ཚོགས་གཞོན་གྱི་ས་ཡིག་འཁོད་དོན་ནི། དེ་སྔོན་དྲུང་ཆེ་མ་གཏོགས་རྒྱུན་ལས་དང་ལས་བྱེད་ཚང་མ་དུས་དབང་ཞུ་བར་ (༣༢) འགྲོ་གཏན་འཁེལ་བར་བརྟེན། སྐབས་འཕྲལ་དངུལ་ཁང་ནས་དངུལ་བཏོན་དགོས་ཚེ་ངེས་པར་རྒྱུན་ལས་གཉིས་ཀྱི་ས་རྟགས་དགོས་པས་ཚོགས་གཞོན་གྱིས་དངུལ་འཛིན་སྟེང་དུ་ཁོ་མོའི་ས་རྟགས་བརྒྱབས་ཡོད། འོན་ཀྱང་དུས་དབང་རིང་དངུལ་འཛིན་བེད་སྤྱོད་བྱ་དགོས་བྱུང་མེད། ) དྲུང་ཆེ་རང་ཉིད་ནས་དངུལ་འཛིན་དེའི་སྟེང་ས་རྟགས་བརྒྱབ་མེད་སྟབས་རྒྱུན་ལས་ནང་ཁུལ་དུ་དོགས་འཆར་བྱུང་སྟེ། ཕྱི་ཟླ་ ༣ ཚེས་ ༢༨ ཉིན་སླར་ཡང་དྲུང་ཆེ་དང་རྩིས་པ་གཉིས་ཀྱིས་གནས་ཚུལ་ཞིབ་ཕྲ་ཤེས་རྟོགས་ཆེད་གསང་བའི་ཐོག་མེག་གྷན་ཨེས་བྷི་ཨའེ་དངུལ་ཁང་དུ་བསྐྱོད་རྗེས། གནས་ཚུལ་དེ་ཚོགས་གཙོས་རྡོ་རྗེ་གླིང་གནས་སྡོད་མཱ་ཡ་པྲ་དྷན་(Maiya Pradhan)ཞེས་པའི་བུད་མེད་ཞིག་བརྒྱུད་ཁོ་མོའི་ཁྱོ་གར་བསྐུར་ཡོད་པའི་དཔང་རྟགས་ར་སྤྲོད་ཁུངས་བཙན་རག་ཐུབ་པ་བྱུང་ཡོད། ཅེས་དང་།

ཡང་གསལ་བཤད་དེའི་ནང་མུ་མཐུད་བཀོད་དོན། ཕྱི་ཟླ་ ༤ ཚེས་ ༣ ཉིན་རྒྱུན་ལས་ཚང་འཛོམས་ཀྱིས་ཚོགས་གཙོར་རང་སྐྱོན་ངོས་ལེན་ཞུ་རྒྱུར་གོ་སྐབས་ཇི་ཙམ་ཕུལ་ཀྱང་དོན་ཕན་གང་ཡང་སོན་མེད་པས་རྒྱུན་ལས་མ་ཡིན་པའི་ལས་བྱེད་ཚོར་ཡང་བཅར་འདྲི་བྱེད་དགོས་བྱུང་ཡོད། ཁོང་ཚོའི་ཕྱོགས་ནས་ཀྱང་ཁས་ལེན་གང་ཡང་བྱས་མེད་པར་བརྟེན་གནས་ཚུལ་ཅི་ཡང་ཤེས་རྟོགས་ཐུབ་མེད། མཐར་འུ་ཐུག་ཐབས་ཟད་ཀྱིས་ཚོགས་གཙོ་གཙོས་རྒྱུན་ལས་དང་ལས་བྱེད་ཚང་མ་མོས་མཐུན་ཐོག་དངུལ་ཁང་བརྒྱུད་འབྲེལ་ཡོད་ཉེན་རྟོགས་པར་སྙན་གསེང་ཞུ་རྒྱུར་ཐག་གཅོད་བྱུང་ཡོད། འོན་ཀྱང་། ཕྱི་ཟླ་ ༤ ཚེས་ ༤ ཉིན་ཞོགས་པ་ཕྱག་ཚོད་ ༩།༣༠ ཐོག་རྒྱུན་ལས་ཚང་འཛོམས་སར། ཚོགས་གཙོས་དཔང་རྟགས་གཞིར་བཞག་ན་དོན་རྐྱེན་དེའི་བརྒྱ་ཆ་ ༩༠ ཙམ་ཚོགས་གཙོ་རང་ཉིད་ཀྱི་ཐོག་བབ་ཚུལ་གསུངས་ཏེ། ཁོང་མོར་ནག་ཉེས་མེད་ཀྱང་ཚོགས་པའི་ཆེ་མཐོང་ཆེད་གནས་སྐབས་རིང་ཁས་ལེན་བྱ་རྒྱུའི་རྣམ་འགྱུར་བསྟན་ཀྱང་རྒྱུན་ལས་ཚང་མས་ཁས་ལེན་བྱས་མེད་པ་མ་ཟད། དེའི་རྗེས་རྩིས་པ་དང་དྲུང་ཆེ། ཚོགས་གཞོན་གསུམ་མེག་གྷན་ཨེས་བྷི་ཨེའི་ (SBI) དངུལ་ཁང་དུ་བསྐྱོད་ཁར་ཚོགས་གཙོ་ཀིརྟི་སྒྲོལ་དཀར་ལྷ་མོས་དོན་རྐྱེན་དེ་ལས་གཡོལ་ཐབས་མེད་པ་ཤེས་ཏེ། དེ་སྔོན་ཚོགས་གཞོན་གྱི་ས་ཡིག་འཁོད་པའི་དངུལ་འཛིན་ཞིག་ལྐོག་ཏུ་ཉར་ཏེ་དྲུང་ཆེའི་ས་རྟགས་བརྫུས་མ་བརྒྱབ་ནས། ཕྱི་ཟླ་ ༣ ཚེས་ ༡༥ ཉིན་ལྡི་ལི་མཐོ་སློབ་ཨེས་བྷི་ཨེའི་དངུལ་ཁང་བརྒྱུད་སྤྱི་དངུལ་ཧིན་སྒོར་འབུམ་གཉིས་རྡོ་རྗེ་གླིང་གི་ཁོ་མོའི་ཁྱིམ་མཚེས་མཱ་ཡ་པྲ་དྷན་(Maiya Pradhan) ཞེས་པའི་བུད་མེད་ཞིག་ལ་བསྐུར་བ་ངོས་ལེན་གཙང་མ་བྱས་ཡོད་པས། སྔ་ཕྱིའི་གནས་ཚུལ་བྱུང་རྐྱེན་དེ་དག་ལ་བརྟེན་ནས་དབུས་སྤྱི་ཁྱབ་རྒྱུན་ལས་ཁང་ནས་ཚོགས་གཙོ་ཀིརྟི་སྒྲོལ་དཀར་ལྷ་མོ་ད་ལྟའི་ལས་གནས་ནས་རྩ་དགོངས་ཞུ་དགོས་པ་དང། རང་སྐྱོན་ངོས་ལེན་ཞུ་ཡིག་འབྲི་དགོས་པ། ཧིན་སྒོར་འབུམ་གཉིས་ལས་ཁུངས་ལ་ཕྱིར་སློག་དགོས་པ་བཅས་གཏན་འབེབས་བྱུང་བ་བཞིན། ཁོ་མོས་ཀྱང་དེ་ལྟར་ཁས་ལེན་བྱུང་བ་དུས་ཐོག་ཏུ་ལག་ལེན་བསྟར་ཡོད། ཅེས་བཀོད་འདུག

གནས་ཚུལ་དེའི་ཐད་ཚོགས་གཙོ་ཀིརྟི་སྒྲོལ་དཀར་ལྷ་མོ་ལགས་སུ་ལ་བཅར་འདྲི་བྱས་པར། ཁོ་མོས་ “ང་རང་ལ་མཚོན་ན་ལོ་ ༢༠ ལྷག་གི་རིང་ལྷག་བསམ་རྣམ་དག་གིས་སྤྱི་ཚོགས་ནང་ཞབས་ཞུ་བསྒྲུབས་ཡོད་པ་ཚང་མས་མཁྱེན་གསལ་རེད། དུས་ཡུན་འདི་དག་ནང་མི་མང་གི་ངོས་ནས་ང་རང་ལ་ཡིད་ཆེས་ཡོད་ལ། ང་རང་གི་ངོས་ནས་ཀྱང་ལྷད་མེད་ཡིན། ད་རེས་གནས་ཚུལ་འདི་འདྲ་ཞིག་བྱུང་ཚར་བ་རེད། ཡིན་ཡང་། ངའི་ངོས་ནས་ཚོགས་པས་དངུལ་ཟ་སེམས་དང་ཀུན་སློང་ངན་པ་ཞིག་ཁུར་ཏེ་ལས་པ་ཞིག་ཆགས་ཀྱི་མེད། གནས་ཚུལ་བྱུང་སྟངས་དེ་ཉེ་སྔོན་ཕྱི་རྒྱལ་དུ་ཡོད་པའི་ངའི་བུས་ཁོའི་རོགས་པ་སྐྱོབ་ཆེད་གཞན་དང་འཁྲུག་འཛིང་ཤོར་སྟེ་བཙོན་འཇུག་བྱས་རྗེས། མཐའ་མར་ཚེ་བཙོན་གྱི་ཁྲིམས་ཐག་གཅོད་ཉེན་འདུག་ཅེས་ང་ལ་ཁ་པར་བསླེབས་སོང་། སྐབས་དེར་མགྱོགས་པོར་དངུལ་ཕོན་ཆེན་པོ་ཞིག་གྲ་སྒྲིག་བྱ་དགོས་བྱུང་སྟེ། མི་ཡར་མར་མང་པོ་ཞིག་ལ་གཡར་རྗེས་གང་འཚམ་རག་སོང་མོད།  ཆ་ཚང་མ་འདང་སྟབས་ཐོག་མར་ལས་ཁུངས་ཀྱི་དངུལ་བེད་སྤྱོད་བཏང་རྗེས། མགྱོགས་པོ་ཕྱིར་སློག་དགོས་བསམ་སྟེ་བླངས་པ་ཡིན།  ཕྱིས་སུ་ཕྱིར་སློག་པའི་དངུལ་ཡང་ང་ལ་རག་ཏེ་ཚོགས་པས་མ་བཤད་སྔོན་དུ་ཕར་རྩིས་སྤྲོད་དང་གསལ་བཤད་བྱ་དགོས་བསམ་ཡོད་ཀྱང་། ཚོགས་ཆེན་དང་ས་གནས་འདྲ་མིན་དུ་འགྲོ་དགོས་པ་སོགས་ཀྱིས་དུས་ཚོད་རྕ་བ་ནས་མ་རག་པར། ཕར་གསལ་བཤད་གནང་ཁོམ་མ་བྱུང་བར་ཚུར་ལབ་དགོས་བྱུང་བ་རེད། གོ་སྐབས་སྤྲད་ཡོད་ཀྱང་ལས་བྲེལ་གྱི་དབང་གིས་འཕྱི་དྲགས་ཏེ་གནས་ཚུལ་འདི་འདྲ་ཞིག་བྱུང་བ་རེད། དེ་ང་རང་གི་ནོར་འཁྲུལ་ཡིན་པ་ངོས་ལེན་བྱེད་ཀྱི་ཡོད། ” ཅེས་བརྗོད་བྱུང་།    

གནས་ཚུལ་འདི་སྤྱི་ཚོགས་ཁྲོད་ཤུགས་ཆེན་པོ་ཁྱབ་ཀྱིན་ཡོད་སྟབས། མང་ཚོགས་ལ་གསལ་བཤད་དང་བརྗོད་འདོད་པའི་སྐད་ཆ་ག་རེ་ཡོད་མེད་དྲིས་པར། ཁོ་མོས། “ ཕྱིས་སུ་ངའི་ངོས་ནས་དངུལ་རྩིས་སྤྲོད་བྱས་པ་དང་མཉམ་དུ་རྒྱུན་ལས་རྣམ་པར་དགོངས་སེལ་ཞུས་པ་ཡིན་ལ། ཁ་སང་ཆེད་དུ་ཚོགས་ཆེན་དུ་བཅར་ཏེ་ཚོགས་བཅར་བ་ཡོངས་ལ་དགོངས་སེལ་ཞུས་པ་ཡིན།  ཉེ་ཆར་ང་ཚོའི་ངོས་ནས་གནས་ཚུལ་ཕྱིར་བསྒྲགས་མི་བྱེད་རྒྱུ་བྱས་ཡོད་ཀྱང་།  གནས་ཚུལ་གང་སར་ཁྱབ་འདུག་ལ། ད་རེས་ཁོང་ཚོའི་གསར་འགོད་གསལ་བསྒྲགས་ཤིག་ཀྱང་བསྐྱངས་པ་རེད། མ་འོངས་པར་གསར་འགོད་གསལ་བསྒྲགས་བརྒྱུད་དེ་གནས་ཚུལ་ཅི་ཞིག་བྱུང་ཡང་དེའི་འགན་ང་ལ་མེད་ཞུ་རྒྱུ་ཡིན། དེ་བཞིན། མི་མང་ལ་ང་རང་ཉིད་ཀྱི་ངོས་ནས་ད་ལྟའི་བར་ནང་མི་དང་ཕྲུ་གུ་ཚང་མ་བློས་བཏང་སྟེ་ཞབས་ཞུ་བསྒྲུབས་ཡོད་ཀྱང་། ད་རེས་ལས་ཀའི་ཐོག་འགལ་འཛོལ་བྱུང་སྟེ་གནས་ཚུལ་འདི་འདྲ་ཞིག་ལྷག་པར་ཚང་མར་དགོངས་སེལ་ཞུས་པ་ཡིན། ཚང་མས་ཐུགས་ལ་མ་གནོད་པ་ཞིག་གནང་རོགས་ཞེས་ཞུ་རྒྱུ་ཡིན། མ་འོངས་པར་ང་མི་སྒེར་བ་ཞིག་གིས་དམིགས་བསལ་གྱི་ཁྱད་པར་བཟོ་མི་ཐུབ་ཀྱང་། རང་ངོས་ནས་ལྷག་བསམ་རྣམ་དག་གིས་སྤྱི་ཚོགས་ལ་ཞབས་ཞུ་བསྒྲུབ་རྒྱུའི་འདུན་པ་ཡོད། ” ཅེས་བརྗོད་བྱུང་།

                                                                                            གསར་འགོད་པ།  དོན་གོ